صحت مند زندگی کے لیے آنتوں کا صحیح طریقے سے کام کرنا انتہائی ضروری ہے۔ اگر آنتوں کی حرکت سست پڑ جائے تو قبض جیسا مسئلہ جنم لیتا ہے جو نہ صرف جسمانی تکلیف کا باعث بنتا ہے بلکہ کئی دیگر بیماریوں کا پیش خیمہ بھی ثابت ہو سکتا ہے۔ دنیا بھر میں لاکھوں افراد اس مسئلے سے پریشان رہتے ہیں۔ اس مضمون میں ہم امریکا کے مشہور کلیو لینڈ کلینک کے ماہرین کے تجویز کردہ کچھ ایسے آسان ٹوٹکے بتا رہے ہیں جو قبض سے فوری ریلیف دلانے میں مددگار ثابت ہو سکتے ہیں۔

1. سونف کا استعمال

سونف کو ہمارے ہاں عام طور پر مہمان نوازی اور منہ کی خوشبو کے لیے استعمال کیا جاتا ہے، لیکن یہ نظام ہاضمہ کے لیے بھی ایک بہترین نسخہ ہے۔ ماہرین کے مطابق سونف میں ایسے قدرتی مرکبات پائے جاتے ہیں جو آنتوں کی حرکت کو تیز کرتے ہیں اور پیٹ کی تکلیف میں کمی لاتے ہیں۔ سونف کو چائے میں شامل کر کے یا کھانے کے بعد بطور غذا استعمال کرنے سے قبض سے فوری نجات مل سکتی ہے۔ یہ گیس اور اپھارہ جیسے مسائل میں بھی مفید ہے۔

2. اسپغول کے فائدے

اسپغول ایک ایسا قدرتی سبزیاتی ریشہ (فائبر) ہے جو نظام ہاضمہ کے لیے انتہائی مفید ہے۔ یہ نہ صرف قبض کو دور کرتا ہے بلکہ ہیضے سے بچاؤ میں بھی مددگار ثابت ہوتا ہے۔ ماہرین کا مشورہ ہے کہ اسپغول کا استعمال شروع میں کم مقدار میں کریں اور پھر ضرورت کے مطابق اس کی مقدار بڑھائیں۔ ابتدا میں دن میں تین بار ایک چائے کا چمچ اسپغول استعمال کریں اور اس کے ساتھ وافر مقدار میں پانی پینا یقینی بنائیں تاکہ یہ اپنا بہترین اثر دکھا سکے۔

3. دالیں اور چنے

غذائی فائبر آنتوں کی صحت کے لیے بنیادی جزو ہے۔ دالیں، چنے اور بیج فائبر سے بھرپور ہوتے ہیں جو ہاضمے کو بہتر بناتے ہیں اور قبض سے نجات دلاتے ہیں۔ البتہ، ان کا استعمال اعتدال میں کرنا ضروری ہے کیونکہ زیادہ مقدار میں چنے یا دال کھانے سے پیٹ پھولنے اور گیس بننے کا خطرہ ہو سکتا ہے۔ انہیں اپنی روزمرہ خوراک کا حصہ بنانا ایک طویل المدتی اور مؤثر حل ہے۔

4. کیوی ایک قدرتی جلاب

کیوی ایک ایسا پھل ہے جو اپنے اندر قدرتی جلاب جیسی خصوصیات رکھتا ہے۔ اس میں وٹامن سی کے ساتھ ساتھ فائبر، پوٹاشیم، وٹامن ای اور فولیٹ جیسے اہم اجزا موجود ہوتے ہیں۔ ماہرین کے مطابق روزانہ دو کیوی کھانے سے قبض سے فوری نجات حاصل کی جا سکتی ہے۔ کیوی میں موجود اینزائمز آنتوں کی حرکت کو تیز کرتے ہیں اور ہاضمے کو بہتر بناتے ہیں، جس سے یہ ایک مزیدار اور قدرتی علاج ثابت ہوتا ہے۔

5. السی کے بیج

السی کے بیج صحت کے لیے ایک خزانہ ہیں۔ ان میں ایسی مفید چکنائی پائی جاتی ہے جو سوزش کو کم کرنے میں مددگار ہوتی ہے۔ ماہرین کا کہنا ہے کہ السی کے بیج قبض کے مؤثر علاج کے طور پر استعمال کیے جا سکتے ہیں کیونکہ ان میں فائبر کی مقدار بہت زیادہ ہوتی ہے۔ روزانہ ایک سے دو کھانے کے چمچ السی کے بیج کھانے سے قبض کو دور رکھنا آسان ہو جاتا ہے۔ انہیں پانی میں بھگو کر یا سلاد میں شامل کر کے کھانا زیادہ فائدہ مند ہے۔

6. ورزش اور جسمانی سرگرمی

جسمانی سرگرمی نہ صرف وزن کم کرنے میں مددگار ہے بلکہ نظام ہاضمہ کو بھی بہتر بناتی ہے۔ ورزش کرنے سے معدے کے مسلز اور آنتوں میں خون کا بہاؤ تیز ہوتا ہے۔ ماہرین کے مطابق قبض سے نجات کے لیے سخت ورزشوں کی ضرورت نہیں، بلکہ تیز رفتاری سے چہل قدمی کرنا بھی کافی مؤثر ثابت ہو سکتا ہے۔ اسے روزمرہ کے معمولات کا حصہ بنانا ضروری ہے تاکہ آنتوں کی حرکت ہمیشہ فعال رہے۔

نوٹ: یہ مضمون طبی جریدوں میں شائع تفصیلات پر مبنی ہے، قارئین اس حوالے سے اپنے معالج سے بھی ضرور مشورہ کریں